سيناريو 5 مصريين أثناء التغيرات الحادثة من 25 يناير 2011...

سيناريو 5 مصريين أثناء التغيرات الحادثة من 25 يناير 2011...


1-
تلميذ الثانوية العامة...


أثناء الأزمة:
تلميذ : بوظوا الاجازة الله يخرب بيوتهم..
تلميذ تاني : بس كان نفسي زكي بدر اللي عاوزنا نطلع بنفهم بجد يغور يا أخي....المشكلة مش هنعرف نلعب كورة النهاردة
التلميذ الأولاني: يا عم مصلحة مش هنروح الدروس..ربنا رحمنا من زيزو الخنيق بتاع العربي..يا رب ياخدلو خازوق في المظاهرات...


بعد الأزمة :
نفس التلميذ : يادي النيلة...ناقصة هي زيادة في منهج التاريخ..و احفظ بقي و علل في ثورة 25 يناير و مطالبها و نتايجها...
التلميذ التاني :ايه ده ؟ هما زودوها في المنهج ؟ الله يخرب بيوتهم...
الأولاني : أيوة يا سيدي ... بس حسام امبراطور التاريخ قالنا علي التوقعات الصاروخية في الموضوع ده..
التاني ( يتنهد بارتياح ) : أه..طمنتني يا عم .. و ايه بقي السؤال المتوقع؟
الأولاني : بيقولك السؤال الوحيد اللي هيتسئل هو الأسباب و كدة...و سيبك من المطالب و النتايج و الحاجات الفاكسة دي ..
التاني : طب فل قوي...بس أنا خايف بجد ييجي يقولك امتي قامت الثورة دي...و أنا اساسا مش بحب احفظ تواريخ...


2-
حشاش....
-- قبل الأزمة : والهي الواحد ظروفه صعبة...مش لاقي حشيش و لو لقاه مش لاقي يشتريه....الله يخرب بيته حسني مبارك
-- أثناء الأزمة :
أحدهم : مش خلاص أقسام البوليس اتحرقت...
الأخر : يا نهار أسود...أمال هنشتري الحشيش منين ؟
الأول : يا عم بس كدة هتعرف تحشش في الشارع براحتك مفيش بوليس...
الأخر : مانا بحشش في الشارع عادي يا سيدي و بييجي عم سيد المخبر يحشش معايا.. يلا..الله يخرب بيت حسني مبارك
--بعد الأزمة :
أحدهم : أهو الدنيا بقت فل و الحشيش رجع تاني يا عم
الأخر ( هو هو نفس الأخر اللي فوق ) يا عم أيوة بس أنا مش لاقي شغل خالص ... و الحشيش غلي قوي عن زمان
الأول : ماهو احنا هنسبت أي حد في الشارع نقلبه في موبايل و لا حاجة و نروح نجيب...و أهو حتي البوليس قاعد في القسم مكسوف يوري وشه للناس
الأخر : يعني لسا هقوم أجيب السلاح من جوه و أنزل أسبت...الله يخرب بيت حسني مبارك
الأول : يا عم ماهو مشي
الأخر : الله يخرب بيته برضه


3-
اخوانجي..
--قبل الأزمة :
أحدهم : مش هيجيبوها البر أعداء الله و رسوله .. شوفت سايبين الداعر الفاجر تامر حسني يغني...لا و مش كفاية ان اسم أبوه حسني...كمان بيغني
الأخر : نهايتهم قريبه باذن الله....
أحدهم : امتي يا أخ عويس....و هؤلاء الفجار مازالو يتركون الاختراع الرجس الذي يدعي ( المرئي ) بمذيعاته الغير منقبات
عويس : معك حق يا أخ سلامة و كفاية بقي متفكرنيش بالمذيعات...
--أثتاء الأزمة :
سلامة : شوفت يا أخ عويس...بيقولو بعض الكفرة اللي أعمارهم أقل من 24 عاما بيشتموا في الداعر حسني مبارك و عاملين أعوذ بالله حاجة اسمها ( ثورة ) باين
عويس : طب يا أخ سلامة ما هو ده باين في مصلحتنا.... عشان نمسك الحكم بقي...و ناخد كل المذيعات..احم ... كل الصلاحيات عشان نصلح المجتمع...
واحد تاني جاي من برة : يا اخوة...وصلتني أخبار اننا هناخد كل واحد 50 جنيه و وجبة فراخ من محل كافر اسمه كشتاكي باين...بس نطلع بقي عشان نجاهد في سبيل الله...
سلامة : طيب هنطلع نعمل ايه بالظبط ؟
الواحد اللي جاي من برة : هنكرر جملة كدة الناس هناك بتقولها .. باين ( الشعب يريد كشك بالحمام ) ..
سلامة : كشك بالحمام ازاي ؟
الواحد : لا استني ... اهي في الورقة .. الشعب يريد اسقاط النظام..
عويس : طب و يا تري يل أخ هنلاقي هناك مذيعات ؟؟
سلامة : أكيد يا أخ عويس...يلا بقي يا سيدي هات ال 50 جنية خلينا نلحق نروح نجاهد في سبيل الله...


قبل نهاية المظاهرات:
سلامة : يا أخ عويس متعرفش احنا هنمشي امتي ؟ .. يا أخ عويس خليك معايا بقي و بطل بص علي الكفرة دول..
عويس : و الله ماعرف يا أخ سلامة .. أهو لما يبطلو يدونا ال 50 جنية ...مع اني مبسوط هنا واللهي وانا بجاهد في سبيل الله..
الأخر المحشش اللي كان فوق : يا عم ماتخرس انت و هو بقي خلي الواحد يعرف يتظاهر..
عويس : يتظاهر ؟ ايه يتظاهر دي ؟
المحشش : يعني اشتم في أي حد عشان مش لاقي اشتري حشيش ...


بعد الأزمة :
سلامة : مش هيجيبوها البر أعداء الله و رسوله ... الكافر الداعر تامر حسني سايبينو يعمل أغنية جديدة...
عويس : نهايتهم قريبة باذن الله


4-
أحد الشباب متظاهر ( من أجل الحق ليس جميعهم )
--قبل الأزمة ( علي الشات )
الشاب : شوفت ياد يا حسام المزة اللي عملتلي أد دي...جامدة قوي
حسام : يسهلوا يا عم بس شكلها مش مصرية
الشاب : مصلحة .. مع ان الواحد كان عاوز يتقابل
( شات في ويندو تانية )
الشاب : هاي....انتي من مصر
المزة : هيك هيك ايوة من مصر...كيف حالك؟
الشاب ( في قرارة نفسه ..فل هنتقابل ) : أنا فل انتي عاملة ايه ؟
المزة : شو فل ما بتشوف اللي بيحصل في بلدنا مصر؟..
الشاب : قصدك الزمالك هياخد الدوري....ده بعينهم....ما خلاص جوزية رجع
المزة : ما بقصد..أنا أقصد الاوضاع في مصر و الظلم و عادش فيه أمان و البلد كلها سرقة و هيك..و كمان البوليس بيعذب الشعب الغلابي...راح تيجي ثورة المصريين يوم 25؟
الشاب : هو احنا حاجزين كورة يومها...بس لو انتي رايحة .. أنا راشق


أثناء الأزمة :
الشاب : الشعب يريد اسقاط النظام..الشعب يريد تغيير الدستور..
صديقه : هو ايه الدستور ده ياد..
الشاب : يا عم انت مالك...قول بس انت مش لسه واخد 100 جنيه...قول ياد يا حسام يمكن يزودونا بكرة..
حسام : ياعم بس أنا عاوز اخرج...اضرب فتة و اروح السينما..
الشاب : ياعم هو في خروجة أحلي من كدة..النيل و أكل و صحبة حلوة...المشكلة اني لسا مش لاقي البت اللي جابتني هنا...من ساعت ما قطعوا النت مش عارف اجيبها..
الأخر المحشش اللي فوق برضه : معاك ولعة يا كابتن؟
الشاب : مش معايا دلوقتي واللهي..شوف الأخ أبو دقن اللي هناك ده معاه بنزين و كبريت و ولاعات و أحلي شغل
المحشش : متشكر يا هندسة .. اللهه يخرب بيت حسني مبارك
الشاب : الشعب يريد تغيير الدستور...الشعب يريد تغيير الدستور


بعد يوم :
حسام : يا عم أنا عاوز اروح بقي
الشاب : مش همشي غير لما حسني مبارك يمشي الأول..هاه
أحد مراسلي القنوات : بس الدستور بيقول انه لو الرئيس مشي مش هينفع اللي ينوب عنه يغير مواد الدستور اللي انتو عاوزين تغيروها يعني ده بيعارض مطالبكو
الشاب : و مين الدستور ده أساسا عشان يقول...هو حسني مبارك لازم يمشي..و يمشي دلوقتي...و لو راجل الدستور ده ييجي هنا
المراسل : طب ليه لازم دلوقتي ؟
الشاب : ليه.. احم..ايه اللي ليه...هو كدة لازم يمشي دلوقتي.. هو كيفي كدة...هو احنا معندناش كرامة و لا ايه
المحشش المعهود ( للمراسل ) معاك ولعة يا أخ أنا دايخ علي ولعة من الصبح...الله يخرب بيت حسني مبارك..
المراسل : طب و ليه بتشتم الرئيس محمد حسني مبارك؟
المحشش : ايه ده هو حسني مبارك ده الرئيس؟!!


بعد الأزمة:
حسام : يا عم اعتقني بقي أنا عاوز أروح لأمي
الشاب : يا عم مانتا أمك و أمي ماتو من الجوع و أبوك طلع عليه حرامي قتله و خد فلوسه..و أنا أبويا مقبضش من 4 شهور و ماشي يشحت في الشوارع..هنسيب ميدان التحرير و نروح فين يعني ؟
حسام : الله يخرب بيتك يا أخي مش كنا روحنا من زمان...المهم احنا هندخل عالنت التهاردة ؟
الشاب : هنروح النت كافيه اللي عند التمثال..انا عاوز الاقي المزة بتاعت زمان دي يا أخي طالعة من نافوخي
حسام : النت كافيه اللي عند التمثال قفل و فتح مكانه جزار بلدي
الشاب : طب نروح اللي عند الدبابة اللي عند المجمع..
حسام : اتفتح مكانو بتاع عصير قصب..
الشاب ( بقلق ) خلاص بقي نحاول النهاردة ننزل مصر نقعد شوية عالنت و نبقي نرجع أخر النهار...
حسام : ماشي عشان حتي نلحق مظاهرة الساعة 7




5-
أحد أصدقائي
قبل الأزمة :
صديقي : أنا اخترعت كاسحة ألغام بتشتغل بالليزر..
مذيعة برامج أطفال : و ايه هو الليزر يا دكتور ؟
صديقي : أنا معرفش قوي بس في ناس كتير قالتلي اختراعك ده حلو أوي منهم عمو حسني اللي فاتح في سفير و كمان أخدت جايزة من الحزب الوطني
المذيعة : ربنا يوفقك و تساهم دايما في تتطوير مستقبل مصر..


أثناء الأزمة :
صديقي : أنا اخترعت نمر ألي ممكن اركبه و يجري بيا..
صديق أخر : اسكت يابني دلوقتي
صديقي : ازاي تقول كدة و انا الحزب الوطني مديني جايزة
الصديق الأخر ( لأحد المتظاهرين ) : الراجل ده واخد جايزة من الحزب الوطني..




بعد الأزمة :
صديقي : أنا اخترعت موبايل قد النملة و تقدر تشيلو معاك في أي حتة ...
أحد زملائه في مركز ( عكاشة للطب النفسي ) و أنا اخترعت حاجة تاني تقدر تشيلها في أي حتة..اخرس بقي بدل ماوريهالك يا أخي صدعت أمي..